عادات سيئة يجب على رائد الاعمال تجنبها
عادات سيئة بنعملها و احنا مش مدركين خطرها علي حياتنا .. يجب على رائد الاعمال تجنبها !
العادة السيئة ممكن نشبهها في شخص بيدمر صحتك النفسية و البدنية, الشخص ده احنا اللي بنسمحله يخش حياتنا و بيتحكم في افعالنا اليومية من غير ما ناخد بالنا
هنتكلم عن شوية من أخطر العادات السيئة اللي محتاجين نعالجها عشان تساعدنا للنجاح في حياتنا الشخصية والمهنية في نفس الوقت
1. الكلام السلبي :
من اكتر الحاجات المؤذية انك تعاتب نفسك بشكل مبالغ فيه, اول متلاقي نفسك بتفتكر مواقف فاتت و بتعاتب نفسك عليها واجه ده بأنك تفتكر نعم ربنا عليك و ايه المميزات و القدرات اللي بتميزك ،، من الاخر بص لنص الكوباية المليان
2. التشاؤم و عدم الثقة بالنفس :
بلاش تتوقع دايما السيناريو الأسوأ بس , الدراسات بتقول ان توقع النتايج السيئة بيأثر علي الأداء بالسلب , فكّر نفسك بالمكاسب اللي هتاخدها لما النتايج تكون كويسة ، افتكر دايما الحكمة ” تفائلوا بالخير تجدوه “
3. المقارنة بغيرك :
الموضوع ده بيأذيك نفسياً و بيهز ثقتك في نفسك ، خليك عارف ان دايما تقدر وعندك فرص وافكار تتقدم بيها خطوات كبيرة من غير مقارنات كل شوية مع منافسينك اكيد لهم ظروف مختلفة عنك
4. الإهمال في صحتك ونفسيتك:
خصص وقت تمارس فيه رياضة وتعمل فيه الحاجات اللي تبسطك , روح للComfort zone بتاعتك المكان اللي مبتحتاجش تبذل فيه مجهود كبير عشان تكون مبسوط وتكافيء نفسك على تعب يوم او انجاز حققته
5. بطّل تقلب في الموبايل اول ما تصحي :
انك تفتح السوشيال ميديا والايميل في بداية اليوم ، الموضوع ده بيخليك تتصدم بالعالم الخارجي و يوصلك الاحداث اللي انت في غني عنها في الوقت ده من اليوم
6. متركزش مع الحاجات اللي متقدرش تتحكم فيها و تقلق نفسك :
ليه تستهلك من وقتك و مجهودك في حاجات مش تحت تصرفك و القلق فيها مش هيغير النتيجة في حاجة , خرج اللي جواك عن طريق انك تكتبه, تحكيه, او … واشغل نفسك بحاجات تانية
7. متستناش تقييم الناس ليك :
كويس انك تاخد اراء الناس لكن انت اللي بتحدد ايه يناسبك و ايه لا و ده ممكن يكون مرجع ليك عشان تتغير للأحسن بس متخليش ده يكون المصدر الوحيد لتقييم نفسك
8. التسويف :
متأجلش الموضوع بشكل عشوائي , قسّم المهام علي حسب اهميتها و مواعيد تسليمها
بسهولة ممكن تستخدم مصفوفة ايزنهاور (هام عاجل “Do” , هام وغير عاجل “Delay” , غير هام و عاجل “Delegate” , غير هام و غير عاجل “Drop”)
مستوحاه من مجموعة كبيرة من المقالات والاراء والخبرات وتم إعادة صياغتها بما يعبر عن منظور الكاتب تجاه كل مقال
اشترك في جروب مجتمع الرواد علي FB
مقالات اكتر عن ريادة الاعمال و الشركات الناشئة
